அஸ்வின்ஸ் திரை விமர்சனம்

தருண் தேஜா இயக்கத்தில் வசந்த் ரவி, விமலா ராமன், சரஸ்வதி மேனன் ஆகியோர் நடிப்பில் வெளியாகி இருக்கும் படம் அஸ்வின்ஸ். விஜய் சித்தார்த் இசையமைக்க எட்வின் ஒளிப்பதிவு செய்துள்ளார்

இதுவரை பல பேய் படங்கள் வந்திருந்தாலும் நிச்சயமாக இப்படம் வித்தியாசமானது என்று அடித்து சொல்லலாம்.  படம் பார்ப்பவர்களை அலற விட்டிருக்கிறார் இயக்குனர். இயக்குனருக்கு இணையாக ரசிகர்களை மிரட்டி இருக்கிறார் இசையமைப்பாளர்.

புராணத்திலிருந்து ஒரு சிறு பகுதியை எடுத்து, அதிலிருந்து டெவலப் செய்து ஒரு வித்தியாசமான படத்தை கொடுத்திருக்கிறார் இயக்குனர் தருண் தேஜா . லண்டனில் உள்ள ஒரு மிகப்பெரிய பங்களாவில் வசித்து வந்த தொல்பொருள் ஆய்வாளர்  விமலா ராமன் மற்றும் அவர் உதவியாளர்கள் மர்மமான முறையில் இறக்க, விமலா ராமன் சடலம் மட்டும் காணாமல் போகிறது. அமானுஷ்யங்களை ஆய்வு செய்யும் வசந்த் ரவியின் குழு லண்டனுக்கு சென்று அந்த பங்களாவை ஆய்வு செய்யச் செல்ல அங்கு நடக்கும் அதி பயங்கர நிகழ்வுகள் தான் அஸ்வின்ஸ் படத்தின் கதை.

ஒரு சிறிய முடிச்சை வைத்துக் கொண்டு படம் நெடுக ரசிகர்களை பயப்படுத்தி இருக்கிறார் இயக்குனர், அவருக்கு தோள் கொடுத்து இருக்கிறார்கள் நடிகர்கள். வசந்த் ரவியின் நடிப்பு மிக அருமை. விமலா ராமன் உள்ளிட்ட மற்றவர்களும் மிகச் சிறப்பாக நடித்திருக்கிறார்கள். 

திகில் படத்துக்கு உரிய மிகச் சிறப்பான பின்னணி இசையை வழங்கி முதுகுத்தண்டை சில்லிட வைத்திருக்கிறார் இசையமைப்பாளர். ஒளிப்பதிவாளர் எட்வின் அவர்களின்  கேமரா பங்களாவுக்கு ஊடுருவிச் செல்ல நம்மையும் கையைப் பிடித்து இழுத்துச் செல்கிறது.  படத்தொகுப்பு படத்திற்கு மிகப்பெரிய பலம். தொழில்நுட்ப ரீதியில் மிகச்சிறந்த படமாக உருவாககி இருக்கிறது அஸ்வின்ஸ் படம் . பல பேய் படங்களை பார்த்திருந்தாலும் இப்படத்தை பார்ப்பவர்களுக்கு நிச்சயமாக ஒரு புது அனுபவமாக இருக்கும்

அலறவிடும் அஸ்வின்ஸ்