பிருத்வி ஆதித்யா இயக்கத்தில் ஆதி, ஆகான்ஷா சிங், நாசர், மைம் கோபி, கிரிஷா குரூப், பிரகாஷ் ராஜ் ஆகியோர் நடிப்பில் இசைஞானி இளையராஜா இசையில் சோனி லைவ் ஓடிடி தளத்தில் வெளியாகி இருக்கும் படம் க்ளாப்.
விளையாட்டு வீரராக சாதிக்க நினைக்கும் ஆதி, வில்லங்கமான ஒரு விபத்தில் தன்னுடைய காலை இழக்கிறார். இதனால் வாழ்வில் தொய்வடைந்து போயிருக்கும் ஆதி, தன்னை போலவே விளையாட்டில் சாதிக்க நினைத்து சோதனைகளால் துவண்டு போயிருக்கும் கிரிஷா குரூப்புக்கு கோச்சாக இருந்து வழிநடத்தி வெற்றிபெறவைக்கிறார்.
சோதனைகளை கடந்து விளையாட்டில் சாதிக்கும் படங்களை தாண்டி, பின்னணியில் இருந்து இயக்கி ஒரு விளையாட்டு வீரரையோ வீராங்கனையையோ உருவாக்கும் படங்களுக்கு எப்போதும் ஒரு ஈர்ப்பு உண்டு, இறுதிச்சுற்று, கனா என பல உதாரணங்களை சொல்லலாம். அந்த வரிசையில் க்ளாப் படம் ஒரு மிகச்சிறந்த படைப்பாக வெளியாகியுள்ளது.
படத்தின் ஆகச்சிறந்த பலம், தொடங்கியது முதல் முடிவு வரை தொய்வில்லாமல் பரபரப்பாக இருப்பது. திரைக்கதை மிகச்சிறப்பாக அமைந்திருக்கிறது. காலை இழந்து தவிக்கும் ஆதியின் நடிப்பு, நடிப்பாக தெரியாமல் அவர் வலியை நம்மை உணரவைக்கிறது. ஆதியின் மனைவியாக நடித்திருக்கும் ஆகான்ஷா சிங், விளையாட்டு வீராங்கனையாக நடித்திருக்கும் கிரிஷா குரூப் என அனைவரும் இயல்பாக நடித்திருக்கிறார்.
இசைஞானி இளையராஜா அவர்களின் பின்னணி இசை படத்துக்கு பலம் சேர்க்கிறது. ஆதி சந்திக்கும் பிரச்சினை தனிப்பட்ட மனிதர்களின் மனவேறுபாடு போல காட்டி இருப்பது அவ்வளவு அழுத்தமாக இல்லை என்பதை தவிர்த்து படத்தில் குறை சொல்ல ஏதும் இல்லை. நிச்சயமாக குடும்பத்துடன் பார்த்து ரசிக்கும் படம் க்ளாப்.
க்ளாப் படத்துக்கு க்ளாப் செய்யலாம்
